Home » ஆறுமுகம் முருகேசன் » ஆறுமுகம் முருகேசன் ,ந.பெரியசாமி கவிதைகள்

 

ஆறுமுகம் முருகேசன் ,ந.பெரியசாமி கவிதைகள்

 

 

 

திரும்புதலின் பாரம் 

எனது மனதில் எறியப்பட்ட உந்தன் கல்                       
கண்ணாடிச்சில்லுகளைப் பொழிந்துள்ளது,
ஸ்தம்பிக்காமல் கேசம் சரி செய்துகொள்
நீ

கொல்லும் நினைவுகள் மீது
ஒரு கூடை வண்ணத்துப்பூச்சிகளின் நிறம்
நீ நிறைந்த என் தனிமை துயரம்
சிலாகித்தல் பழகுதல் அழகு

சூழும் மேகத்தின் உள்
பறக்கும் விமானம் அண்ணாந்து தேடும்
பால்யனாய் திரும்புகிறேன்
நான்

சில்லுகளில் வழியும் குருதி
தோய்த்த விரல்களுடன் வருகிறாய்
நமது பெருங்காதல் நோக்கி

காத்திருப்புகளின்றிப் பிரிவுக்குஏது உயிர்

மௌனத்தின்மேல் மெல்லிய ஒப்பனையுடன்
ஈர்க்கும்
உனது அன்பு பெய்யும் மழையில்
திரும்புகிறேன்
பெருவலியின் தடயங்கள் கழுவி

************

— ஆறுமுகம் முருகேசன்

—————————————————————————————————————-

 

ந.பெரியசாமி கவிதைகள்

கனவில் கடவுளிடம்
குழந்தை கேட்டாள்
மழை வேண்டுமென
நேரில் குழந்தையிடம்
கடவுள் வேண்டினார்
நிறைய்ய செடிவளர்க்க வேண்டுமென…
0

அடப்பாவி
கொலைபாதகாவென
திட்டக்கூடும் நண்பர்களே
எறும்பிடமிருந்து பிடுங்கிய அரிசியால்
நாவை எச்சால் நனைத்த
நாட்களை நினைவுகூற

வேறு பருக்கைகள் அவைகளுக்கு
எளிதில் கிட்டிவிடும்…
0

நிரம்பாத போதையால்
தவிப்படைந்தவன்
அழைத்துக்கொண்டிருந்தான்
வாருங்களேன் தற்கொலை செய்துகொள்வோமென
நீங்கள் எல்லோரும் கொலைகாரர்கள்தானே
மறந்துவிட்டீர்களா
ஆத்மநாமை…

0000

 

No comments

Be the first one to leave a comment.

Post a Comment